Heimavellir skrifa undir þriggja milljarða lánasamning við erlendan aðila

Leigufélagið Heimavellir hefur gert lánasamning að andvirði þriggja milljarða króna við bandaríska sjóðastýringafélagið Eaton Vance Management fyrir milligöngu Fossa markaða. Unnið hefur verið að endurfjármögnun félagsins að undanförnu og er gerð lánasamningsins liður í þeirri vinnu. Samhliða henni lækkar fjármagnskostnaður félagsins.

Þá hefur Eaton Vance jafnframt keypt hlutabréf í Heimavöllum fyrir um 300 milljónir króna. Sem kunnugt er eru áform Heimavalla að skrá félagið á markað en almennt útboð á nýju hlutafé í félaginu hefst í byrjun maí og verður í kjölfarið tekið til viðskipta á Aðalmarkaði Kauphallar Íslands. Skráningarlýsing vegna hlutafjárútboðsins hefur nú þegar verið birt og hana má nálgast hér ásamt öðrum gögnum sem tengjast hlutafjárútboði félagsins.

Þessa dagana fara fram kynningar með fjárfestum en opinn kynningarfundur verður haldinn fimmtudaginn 2. maí kl. 8:30 á Grand Hótel Reykjavík.

Guðbrandur Sigurðsson, framkvæmdastjóri Heimavalla:

„Það er mikilvægt fyrir okkur að finna fyrir því trausti sem erlendir aðilar hafa á starfsemi Heimavalla og þeirri framtíðarsýn sem lögð hefur verið upp í aðdraganda skráningar félagsins á markað. Það birtist meðal annars í því að erlendir aðilar eru tilbúnir að fjármagna félagið yfir lengri tíma og samhliða koma inn sem hluthafar. Markmiðið er að Heimavellir, sem er stærsta leigufélag sinnar tegundar á Íslandi, sé í dreifðri eignaraðild og góð viðbót í hóp skráðra félaga í Kauphöll Íslands. Þá styður skráning í Kauphöll við framtíðarsýn félagsins – sem er að stuðla að fjölbreyttari og stöðugri húsnæðismarkaði á Íslandi. Við teljum að þróun leigumarkaðar eins og þekkst hefur á Norðurlöndunum og víðar í Evrópu um áratugaskeið sé mikilvægt framfararskref, sem gerir örugga langtímaleigu á að valkosti fyrir almenning.

Haraldur Þórðarson, forstjóri Fossa markaða:

„Fossar markaðir hafa að undanförnu með sérfræðiþekkingu sinni og öflugu tengslaneti haft milligöngu um aðkomu erlendra fjárfesta að íslensku viðskiptalífi. Aðkoma erlendra aðila að starfsemi Heimavalla, bæði með lánveitingu og fjárfestingu í félaginu, sýnir bæði þá trú sem þeir hafa á félaginu og eins á efnahagslífinu hér á landi. Við teljum að fjölbreyttari hópur fjárfesta í íslensku atvinnulífi styðji við bakið á stjórnendum fyrirtækja, miðli mikilvægri reynslu og stuðli að dreifðari áhættu í efnahagslífinu.“